Dagur leikskólans er haldin hátíðlegur ár hvert þann 6. febrúar. Markmið dagsins er að beina sjónum samfélagsins að leikskólanum og því kraftmikla, metnaðarfulla og góða starfi sem þar fer fram á degi hverjum. 6. febrúar 2012 byrjuðum við í Árbæ á þeirri skemmtilegu hefð að fara, allar deildir saman, í skrúðgöngu og höfum við alltaf farið að Ráðhúsi Árborgar og sungið þar á tröppunum fyrir vegfarendur og aðra sem vildu á okkur hlusta. Í ár breyttum við útaf vananum og heimsóttum Viss, vinnu- og hæfingarstöð. Ferðin var einstaklega vel heppnuð en starfsfólkið í Viss tók vel á móti okkur þar sem við fengum að koma inn og sungum þar fyrir þau nokkur vel valin lög. Börn og starfsfólk í Árbæ sem og starfsfólk í Viss voru virkilega ánægð með hvernig til tókst og spennt fyrir að fá að koma einhvern tímann aftur í heimsókn.
