Útskrift þeirra barna sem byrja í grunnskóla í haust fer fram í Múla (húsi Tónlistarskóla Árnesinga) þriðjudaginn 10. maí 2011 kl. 17:30. Þá fá börnin útskriftarskjöl í hendur, einnig verða skemmtiatriði og léttar veitingar.
Börnin hætta í leikskólanum samkvæmt óskum foreldra.
Við viljum nota tækifærið og minna foreldra á að uppsagnarfrestur er 1 mánuður.
Foreldraviðtöl í Árbæ eru í apríl. Deildarstjórar boða foreldra til viðtals.
Í foreldraviðtalinu er farið yfir Heilsubók barnsins. Heilsubók barnsins hefur að geyma útfærð skráningarblöð varðandi þroska og ýmsar upplýsingar um barnið. Skráningin gerir leikskólanum kleift að fylgjast með þroskaframvindu barnsins og er einnig tæki til að upplýsa foreldra um stöðu þess í leikskólanum. Skráð er m.a. heilsufar, hreyfifærni, úthald, hæð og þyngd, næring og svefn, lífsleikni og færni í listsköpun. Skráningin fer fram tvisvar á ári, haust og vor og foreldrum boðið í viðtal í kjölfarið.
Mánudaginn 21. mars verður leikskólinn Árbær lokaður fyrir hádegi vegna starfsmannafunds.
Leikskólinn opnar kl. 12:00 þennan dag. Hádegismatur verður í boði.
Starfsfólk Árbæjar.
Miðvikudaginn 16. mars er gulur litadagur. Þá væri gaman ef sem flestir gætu mætt í gulu.
Leikritið Prumpuhóll verður sýnt í salnum þann 16. mars klukkan 10:30
Foreldrafélag Árbæjar stendur fyrir leiksýningu fyrir öll börn leikskólans þann 16. mars næstkomandi og var leikritið Prumpuhóll fyrir valinu. Leikritið var frumsýnt í Möguleikhúsinu árið 2002 og hefur það nú verið tekið upp á ný með nýjum leikurum.
Um Prumpuhól
Hulda er nýflutt úr borginni og upp í sveit. Þegar hún fer í feluleik með Halla bróður sínum vill ekki betur til en hún villist og ratar ekki heim. Henni líst ekkert á þetta umhverfi þar sem allt er framandi; lyktin er náttúrufýla, grasið stingur og það eru pöddur út um allt!
Við sérkennilegan hól sem gefur frá sér dularfull hljóð hittir hún Steina. Hann er kátur tröllastrákur í skrítnum fötum sem segir Huldu að hóllinn sé í raun pabbi hans. Hann hafi lent í sólargeisla og orðið að steini eftir að hafa borðað rosalega mikinn hundasúrugraut. En hundasúrugrauturinn varð ekki að steini. Ónei, hann ólgar enn svo drynur í hólnum. Og fýlan… maður lifandi! Sýningin er ætluð áhorfendum á aldrinum 2ja til 10 ára og tekur 45 mínútur í flutningi.
Miðvikudaginn 9. febrúar er öskudagur. Þá er NÁTTFATABALL Í ÁRBÆ.
Þá mætum við í náttfötum, sláum köttinn úr tunnunni, höldum ball í salnum og höfum það huggulegt.
Hlökkum til.
Á mánudaginn fór útskriftarárgangur Árbæjar í Húsið á Eyrarbakka. Farið var með rútu í boði foreldrafélagsins. Svo fengum við leiðsögn um húsið. Þetta var fróðleg og skemmtileg ferð.
Mánudaginn 21. febrúar, verður dömukaffi í Árbæ. Þá eru allar dömur tengdar börnunum velkomnar í morgunkaffi frá 8:10 – 9:30. Mömmu, ömmur, systur, frænkur og vinkonur eru velkomnar til að fá sér kaffi, spjalla og leika sér við börnin á þessum tíma.
Vonumst til að sjá sem flestar dömur.
Starfsfólk Árbæjar
Þriðjudaginn 8. febrúar var þorrinn blótaður í Árbæ. Um morguninn söfnuðust börn og kennarar í salinn. Þar léku börnin á Heiðarsundi leikritið um Búkollu fyrir alla og svo sungu allir nokkur lög. Þetta var mjög gaman.
